För 4 Teilnehmer het de Tag hüt früeh gstartet. Sie sind ide Nacht gweckt wurde, demit si eus Leiter hend chöne zeige, dass sie parat sind för is Leitigsteam – sie hends grandios gmeisteret!

För alli andere het de Tag gmüetlich mitemene Atelier gstartet. Sie hend Sackmesser gschnitzt, Gruppevase bemalt, Lederbändeli gmacht und na fell wiiteri tolli Sache.

Über de Mittag hemmer eus gstärkt, wel am Namittag hemmer fell Energie bruucht, nämli för d Raufgames. Be American Bulldog, Belgisch Blinzle, Rüeblizieh, Armdrucke… hend sich alli chöne ustobe.

Euse Energietank hemmer mit de Spätzlipfanne wider ufgföllt, sodass mer wider fit för es Gländgame gsii sind. Mer händ de Wassergott Poseidon mit fellne Wasserspili begeisteret. All Chind sind mit fell Elan debii gsii.